नवीन काँग्रेस भवनाची घोषणा

 कल्याण–डोंबिवलीत काँग्रेसचा प्रजासत्ताक दिन उत्साहात साजरा

राजाभाऊ पातकरांच्या नेतृत्वात शक्तिप्रदर्शन, नवीन काँग्रेस भवनाची घोषणा**

           कलम भूमी,कल्याण प्रतिनिधी 

कल्याण–डोंबिवली महापालिका हद्दीत प्रजासत्ताक दिन मोठ्या उत्साहात व अभिमानाने साजरा करण्यात आला. काँग्रेसचे जिल्हाध्यक्ष राजाभाऊ पातकर यांच्या सक्षम नेतृत्वाखाली टिळक चौक येथील काँग्रेस कार्यालयाच्या प्रांगणात भव्य ध्वजवंदन सोहळा पार पडला.

या कार्यक्रमाला काँग्रेस कार्यकर्ते, पदाधिकारी, आजी-माजी नगरसेवक तसेच नागरिकांनी मोठ्या संख्येने उपस्थिती लावून काँग्रेसच्या एकजुटीचे व शक्तीचे दर्शन घडवले. संपूर्ण परिसर देशभक्तीच्या घोषणांनी आणि उत्साहाने भारावून गेला होता.

या प्रसंगी प्रदेश सचिव ब्रिज दत्त, राजेश मुन्ना तिवारी (प्रदेश सचिव), नवीन सिंग, नवनिर्वाचित नगरसेविका कांचन कुलकर्णी, इफ्तेखार खान, अजम शेख, तसेच काँग्रेसचे अनेक मान्यवर पदाधिकारी व कार्यकर्ते उपस्थित होते. हजारोंच्या संख्येने काँग्रेसचे निष्ठावंत कार्यकर्ते या कार्यक्रमात सहभागी झाले होते, हे विशेष.

नवीन काँग्रेस भवनाची ऐतिहासिक घोषणा

ध्वजवंदनानंतर जिल्हाध्यक्ष राजाभाऊ पातकर यांनी कार्यकर्त्यांना मार्गदर्शन करताना कल्याण–डोंबिवलीत लवकरच नवीन काँग्रेस भवन उभारण्यात येणार असल्याची घोषणा केली.

“काँग्रेस पक्षाची संघटना अधिक मजबूत करणे, सामान्य जनतेच्या प्रश्नांसाठी रस्त्यावर उतरून लढणे आणि युवकांना नेतृत्वाची संधी देणे, हे आमचे प्रमुख उद्दिष्ट आहे,” असे ठाम शब्दांत त्यांनी सांगितले.

त्यांच्या या घोषणेमुळे उपस्थित कार्यकर्त्यांमध्ये नवीन उत्साह, ऊर्जा आणि आत्मविश्वास संचारला. काँग्रेस पक्ष पुन्हा एकदा ताकदीने उभा राहत असल्याचा स्पष्ट संदेश या कार्यक्रमातून गेला.

शिवाजी महाराज चौकातही ध्वजवंदन

दरवर्षीप्रमाणे कल्याण शिवाजी महाराज चौकात देखील प्रजासत्ताक दिनानिमित्त प्रदेश सचिव ब्रिज दत्त यांच्या हस्ते तिरंगा ध्वज फडकावण्यात आला. यावेळी राष्ट्रीय गीताचे सामूहिक गायन करण्यात आले, ज्यामुळे वातावरण देशभक्तीने भारावून गेले.

काँग्रेसमध्ये नवी चेतना, नवा आत्मविश्वास

या संपूर्ण कार्यक्रमातून काँग्रेस पक्षात नवचैतन्य निर्माण झाले असून, आगामी स्थानिक स्वराज्य संस्थांच्या निवडणुकांच्या पार्श्वभूमीवर हा कार्यक्रम शक्तीप्रदर्शन ठरला आहे.

राजाभाऊ पातकर यांच्या नेतृत्वात काँग्रेस पुन्हा एकदा सामान्य जनतेचा विश्वास जिंकण्यासाठी सज्ज असल्याचे स्पष्ट दिसून आले.