बीएसयूपीमधील महास्कँडल फोड — महापालिका अधिकारी व झोपडपट्टी दादांचे संगनमत उघड!
महापालिका मुख्यालयासमोर हाणामारी; भोंगळ कारभार जनता रस्त्यावर
कलम भूमी, कल्याण प्रतिनिधी,
कल्याण डोंबिवली महानगरपालिकेचा भोंगळ कारभार आणि बीएसयूपी योजनेतील प्रचंड भ्रष्टाचार पुन्हा एकदा चव्हाट्यावर आला आहे.
टिटवाळा येथील झोपडपट्टीधारकांसाठी असलेल्या बीएसयूपी घरवाटपात महापालिका अधिकारी व स्थानिक झोपडपट्टी दादांचे संगनमत असल्याचे गंभीर आरोप पुढे आले आहेत.
झोपडपट्टीतील गरीब लाभार्थ्यांना “मी बिल्डर आहे, माझ्याकडे ओळखी आहेत” असे सांगत हजारो रुपयांची उकळपट्टी करणाऱ्या मध्यस्थांवर महापालिकेच्या अधिकाऱ्यांनी जाणूनबुजून डोळेझाक केल्याचा आरोप तक्रारदारांनी केला आहे.
याच गैरव्यवहाराविरोधात आवाज उठवणाऱ्या बीएसयूपी धारक उमर मन्सुरी यांच्यावर महापालिका मुख्यालयासमोरच सर्वांसमोर हाणामारी झाली. मन्सुरी यांनी महापालिका अधिकाऱ्यांकडे वर्तविलेल्या तक्रारीमुळेच ही मारहाण घडवून आणल्याचा आरोप आहे. या हाणामारीत त्यांना गळ्यावर आणि छातीवर गंभीर जखमा झाल्या असून त्यांनी पोलिसांत तक्रार दाखल केली आहे.
महापालिका अधिकाऱ्यांकडे अनेक तक्रारी — पण कारवाई शून्य!
बीएसयूपी प्रकल्पांत गेल्या अनेक वर्षांपासून:
- अपात्रांना घरे,
- पात्रांना दिरंगाई,
- मध्यस्थांकडून पैशांची मागणी,
- फाईली अडकवून ठेवणे,
- आणि प्रश्न उपस्थित करणाऱ्यांवर दबाव व धमक्या
असे गंभीर प्रकार सुरू असल्याचे लाभार्थ्यांनी स्पष्ट केले.
तक्रारदारांचे म्हणणे आहे की,
“झोपडपट्टी दादांकडून होणाऱ्या लुटीला महापालिकेतील काही भ्रष्ट अधिकारीच पाठबळ देत आहेत. अधिकारी–दादा यांचे संगनमत नसते तर हा भ्रष्टाचार एका दिवसात थांबला असता.”
जनतेची मागणी : भोंगळ बीएसयूपी विभागावर तात्काळ चौकशी
लाभार्थ्यांनी आरोप केले की बीएसयूपी विभागात अनेक वर्षांपासून सतत तक्रारी, अर्ज आणि पाठपुरावा करूनही कोणतीही ठोस कारवाई केली गेली नाही. अधिकाऱ्यांचा निष्क्रिय व बेफिकीर कारभार हा भ्रष्टाचाराला थेट आश्रय देणारा ठरला आहे.
महापालिका आयुक्तांनी या संपूर्ण प्रकरणाची उच्चस्तरावर चौकशी करून अधिकारी–मध्यस्थ दादांविरुद्ध कठोर कारवाई करावी, अशी संतप्त मागणी नागरिकांनी केली आहे.
