नारळी पौर्णिमेनिमित्त आगरी-कोळी बांधवांचा जल्लोष; पारंपरिक नारळ पालखी सोहळ्याने कल्याण दुमदुमले
कलम भूमी, कल्याण प्रतिनिधी,
कल्याण : समुद्राशी आणि जलसंपदेशी असलेले नाते जपत आगरी-कोळी समाजाच्या वतीने नारळी पौर्णिमेचा सण यंदाही मोठ्या उत्साहात, पारंपरिक पद्धतीने आणि भक्तिमय वातावरणात साजरा करण्यात आला. कल्याण शहरातील छत्रपती शिवाजी महाराज चौक येथून पारंपरिक नारळ पालखी मिरवणुकीला सुरुवात झाली. ढोल-ताशांच्या प्रचंड गजराने परिसर दुमदुमून गेला असून, हजारो आगरी-कोळी बांधवांच्या उपस्थितीने उत्सवाला मोठे स्वरूप प्राप्त झाले.
शिंदे सेनेचे आमदार विश्वनाथ भोईर यांच्या नेतृत्वाखाली नारळ पालखी सोहळ्याची सुरुवात करण्यात आली. पारंपरिक वेशभूषेत सहभागी झालेल्या समाजबांधवांनी ढोल-ताशांच्या तालावर उत्साहात मिरवणुकीत सहभाग घेतला. छत्रपती शिवाजी महाराज चौकापासून सुरू झालेली ही मिरवणूक कल्याणच्या खाडीच्या दिशेने मार्गस्थ झाली. यावेळी ‘एकजुटीचा’ संदेश देत मोठ्या संख्येने नागरिक आणि समाजबांधव सहभागी झाले होते.
नारळी पौर्णिमा हा आगरी-कोळी समाजासाठी केवळ धार्मिक सण नसून, त्यांच्या पारंपरिक जीवनपद्धतीशी आणि समुद्राशी असलेल्या अतूट नात्याचे प्रतीक मानला जातो. समुद्राला नारळ अर्पण करून सुरक्षित जलप्रवास, भरभराट आणि सुख-समृद्धीसाठी प्रार्थना करण्याची परंपरा या दिवशी जपली जाते. त्यानुसार कल्याणच्या खाडीत पोहोचल्यानंतर विधिवत पूजा-अर्चा करण्यात आली आणि खाडीला नारळ अर्पण करण्यात आला.
या सोहळ्यादरम्यान कल्याण-डोंबिवलीमहानगरपालिकेच्या महापौर अ‍ॅड. हर्षाली विज चौधरी-थविल यांचा उपस्थितांच्या वतीने सत्कार करण्यात आला. यावेळी महापौर हर्षाली ताई थविल यांनी आगरी-कोळी समाजबांधवांना नारळी पौर्णिमेच्या हार्दिक शुभेच्छा दिल्या. समाजाची सांस्कृतिक आणि पारंपरिक ओळख जपण्यासाठी अशा उत्सवांचे महत्त्व मोठे असल्याचे त्यांनी यावेळी सांगितले.
मिरवणुकीदरम्यान पारंपरिक वाद्यांचा गजर, भगवे व विविध रंगांचे ध्वज, पारंपरिक पोशाख आणि मोठ्या संख्येने सहभागी झालेल्या महिला, पुरुष व युवकांमुळे संपूर्ण परिसरात उत्साहाचे वातावरण निर्माण झाले होते. अनेकांनी पारंपरिक पद्धतीने नारळाची पूजा करून आपल्या कुटुंबाच्या सुख-समृद्धीसाठी प्रार्थना केली.
हजारो समाजबांधवांच्या उपस्थितीत पार पडलेल्या या नारळ पालखी सोहळ्यामुळे कल्याण शहरातील आगरी-कोळी समाजाची सांस्कृतिक एकजूट आणि परंपरेशी असलेली नाळ पुन्हा एकदा अधोरेखित झाली. जल, समुद्र आणि निसर्गाशी असलेले नाते जपत पुढील पिढीलाही या समृद्ध परंपरेची ओळख करून देण्याचा संदेश या उत्सवातून देण्यात आला.
