शिंदे सेनेला डोंबिवलीत मोठा धक्का! युवा सेनेचे २५ पदाधिकारी-कार्यकर्ते भाजपात; महायुतीतील अंतर्गत संघर्ष पुन्हा उफाळला
कलम भूमी, कल्याण प्रतिनिधी
डोंबिवली : महायुतीतील सहयोगी पक्ष असलेल्या भारतीय जनता पक्ष (भाजप) आणि शिवसेना (शिंदे गट) यांच्यात स्थानिक पातळीवर सुरू असलेल्या पक्षांतराच्या राजकारणाला पुन्हा एकदा वेग आला आहे. डोंबिवली येथील भाजप कार्यालयात कल्याण जिल्हाध्यक्ष नंदू परब आणि केडीएमसीमधील भाजप गटनेते शशिकांत कांबळे यांच्या उपस्थितीत शिवसेना (शिंदे गट) युवा सेनेचे तब्बल २५ पदाधिकारी व कार्यकर्त्यांनी भाजपात जाहीर प्रवेश केला. या पक्षप्रवेशामुळे कल्याण-डोंबिवलीच्या राजकीय वर्तुळात मोठी खळबळ उडाली असून, महायुतीतील अंतर्गत मतभेद पुन्हा एकदा समोर आले आहेत.
शिवसेना युवा आघाडीचे विधानसभा समन्वयक अर्चित खडकुल यांच्या नेतृत्वाखाली झालेल्या या पक्षप्रवेशात अनेक सक्रिय युवा पदाधिकारी सहभागी झाले. यावेळी भाजप नेत्यांनी सर्वांचे पक्षात स्वागत करत त्यांना संघटनेत योग्य जबाबदाऱ्या देण्याचे आश्वासन दिले.
बैठकीतून हकालपट्टी झाल्याने नाराजी
भाजपात प्रवेशानंतर अर्चित खडकुल यांनी शिवसेना नेतृत्वावर नाराजी व्यक्त केली. त्यांनी सांगितले की, पक्षामध्ये युवा कार्यकर्त्यांना योग्य सन्मान दिला जात नाही. काही दिवसांपूर्वी पक्षाच्या बैठकीत आमच्या काही पदाधिकाऱ्यांना विनाकारण बाहेर काढण्यात आले. या अपमानास्पद वागणुकीमुळे युवा कार्यकर्त्यांमध्ये तीव्र असंतोष निर्माण झाला होता. अखेर आम्ही भाजपमध्ये प्रवेश करण्याचा निर्णय घेतला, असे त्यांनी स्पष्ट केले.
भाजप अधिक मजबूत होत असल्याचा दावा
यावेळी बोलताना भाजपचे कल्याण जिल्हाध्यक्ष नंदू परब यांनी सांगितले की, प्रदेशाध्यक्ष रविंद्र चव्हाण यांच्या नेतृत्वाखाली भाजप राज्यभर वेगाने विस्तारत आहे. पक्षाच्या विकासाभिमुख धोरणांमुळे आणि विचारसरणीमुळे विविध पक्षांतील कार्यकर्ते मोठ्या संख्येने भाजपमध्ये प्रवेश करत आहेत. आतापर्यंत राज्यभरात सुमारे एक लाख नागरिकांनी भाजपमध्ये प्रवेश केल्याचा दावाही त्यांनी केला.
कल्याण-डोंबिवलीतील युवा सेनेच्या कार्यकर्त्यांचा प्रवेश हा त्याच प्रक्रियेचा भाग असून, त्यांच्या अनुभवाचा आणि संघटन कौशल्याचा भाजपला निश्चितच फायदा होईल, असा विश्वास त्यांनी व्यक्त केला.
भाजपचा प्रभाव वाढत असल्याचा कांबळे यांचा दावा
केडीएमसीतील भाजपचे गटनेते शशिकांत कांबळे म्हणाले की, भाजपच्या विकासाच्या अजेंड्यावर विश्वास ठेवून विविध पक्षांतील कार्यकर्ते भाजपमध्ये येत आहेत. युवा सेनेच्या २५ पदाधिकारी व कार्यकर्त्यांचा प्रवेश हा कल्याण-डोंबिवली परिसरात भाजपची संघटनात्मक ताकद सातत्याने वाढत असल्याचे द्योतक आहे.
महायुतीत पक्षांतरावरून आधीच सुरू होती आरोप-प्रत्यारोपांची मालिका
गेल्या काही दिवसांपासून भाजप आणि शिवसेना (शिंदे गट) यांच्यात एकमेकांचे पदाधिकारी आणि कार्यकर्ते आपल्या पक्षात सामील करून घेण्यावरून आरोप-प्रत्यारोप सुरू आहेत. भाजपचे जिल्हाध्यक्ष नंदू परब यांनी यापूर्वी सहयोगी पक्षाने भाजपच्या पदाधिकाऱ्याला आपल्या पक्षात घेतल्याबद्दल नाराजी व्यक्त करत, ते महायुतीच्या धर्माच्या विरोधात असल्याचे म्हटले होते. त्याला प्रत्युत्तर देताना शिवसेनेचे संपर्कप्रमुख महेश गायकवाड यांनी भाजपच प्रथम कार्यकर्ते फोडत असल्याचा आरोप केला होता.
स्थानिक राजकारणात नव्या समीकरणांची चर्चा
दरम्यान, युवा सेनेतील २५ पदाधिकारी व कार्यकर्त्यांच्या भाजप प्रवेशामुळे कल्याण-डोंबिवलीतील महायुतीच्या राजकारणात नव्या समीकरणांची चर्चा रंगली आहे. आगामी स्थानिक स्वराज्य संस्थांच्या निवडणुकांच्या पार्श्वभूमीवर या पक्षांतराचे दूरगामी राजकीय परिणाम होण्याची शक्यता राजकीय निरीक्षक व्यक्त करत आहेत. महायुतीतील सहयोगी पक्षांमध्ये वाढत चाललेली स्पर्धा आणि एकमेकांच्या संघटनांमध्ये सुरू असलेली गळती आगामी काळात आणखी तीव्र होण्याची चिन्हे दिसत आहेत.
