कल्याण येथे आयोजित जिल्हास्तरीय कुस्ती निवड चाचणी स्पर्धेला भाजप नेतृत्वाचा भक्कम पाठिंबा
कलम भूमी,कल्याण प्रतिनिधी,
कल्याण : कल्याण डोंबिवली महानगरपालिका, कल्याण डोंबिवली कुस्तीगीर महासंघ आणि सुधीर दशरथ गायकर प्रतिष्ठान यांच्या संयुक्त विद्यमाने कल्याण येथे जिल्हास्तरीय कुस्ती निवड चाचणी स्पर्धेचे उत्साहपूर्ण आयोजन करण्यात आले. या स्पर्धेचे उद्घाटन महाराष्ट्र भाजपचे प्रदेशाध्यक्ष रवींद्र चव्हाण यांच्या हस्ते पार पडले. या निमित्ताने परिसरातील क्रीडा क्षेत्राला नवसंजीवनी मिळाल्याचे चित्र पाहायला मिळाले.
गेल्या काही वर्षांपासून पारंपरिक मातीतील कुस्ती आणि मॅटवरील आधुनिक कुस्ती या दोन्ही प्रकारांना प्रोत्साहन देण्यासाठी स्थानिक पातळीवर सातत्याने प्रयत्न होत आहेत. या पार्श्वभूमीवर आयोजित करण्यात आलेल्या निवड चाचणी स्पर्धेत मोठ्या संख्येने युवा कुस्तीपटूंनी सहभाग घेतला. ग्रामीण व शहरी भागातील प्रतिभावान खेळाडूंना राज्य व राष्ट्रीय स्तरावर संधी मिळावी, हा या उपक्रमामागील प्रमुख उद्देश असल्याचे आयोजकांनी सांगितले.
या कार्यक्रमातून भारतीय जनता पक्षाच्या नेतृत्वाने क्रीडा क्षेत्राला दिलेला पाठिंबा पुन्हा अधोरेखित झाला. युवा पिढीला आरोग्यदायी जीवनशैलीकडे वळवणे, स्थानिक प्रतिभेला व्यासपीठ उपलब्ध करून देणे आणि पारंपरिक खेळांचे संवर्धन करणे ही भाजपची सातत्यपूर्ण भूमिका असल्याचे रवींद्र चव्हाण यांनी यावेळी स्पष्ट केले. जिल्हा, राज्य आणि राष्ट्रीय स्तरावर उत्कृष्ट कुस्तीपटू घडवण्यासाठी अशा स्पर्धा महत्त्वाच्या ठरतात, असेही त्यांनी नमूद केले.
कार्यक्रमास जिल्हाध्यक्ष नंदू परब, नाना सूर्यवंशी, नगरसेवक अमित धाक्रस, वरुण पाटील, मोरेश्वर भोईर, माजी नगरसेवक भाने तसेच नगरसेवक श्यामल व मंगेश गायकर यांची उपस्थिती होती. स्थानिक कार्यकर्त्यांनी आणि क्रीडाप्रेमींनी मोठ्या उत्साहात स्पर्धेला प्रतिसाद दिला.
या उपक्रमातून भाजप नेतृत्वाच्या मार्गदर्शनाखाली कल्याण-डोंबिवली परिसरात क्रीडा, सामाजिक आणि युवक विकासाच्या विविध उपक्रमांना गती मिळत असून, आगामी काळातही अशाच स्पर्धांद्वारे नवोदित खेळाडूंना मोठे व्यासपीठ उपलब्ध करून देण्याचा निर्धार आयोजकांनी व्यक्त केला.
