सर्व जनिक वाचनालय पुरस्कार,

 

सार्वजनिक वाचनालय, कल्याणला महाराष्ट्र शासनाचा सर्वोत्कृष्ट ग्रंथालय पुरस्कार

     कलम भूमी,कल्याण प्रतिनिधी,

कल्याण – महाराष्ट्र शासनाच्या उच्च व तंत्र शिक्षण विभागांतर्गत ग्रंथालय संचालनालयाकडून सन २०२३-२४ या वर्षासाठीचा डॉ. बाबासाहेब आंबेडकर सर्वोत्कृष्ट ग्रंथालय पुरस्कार या ऐतिहासिक सार्वजनिक वाचनालय, कल्याणला जाहीर झाला आहे. तब्बल १६२ वर्षांची अखंड वाचन परंपरा जपणाऱ्या या ग्रंथालयाला हा सन्मान मिळाल्याने वाचनालय क्षेत्रात आनंदाचे वातावरण आहे.

राज्यातील शासनमान्य सार्वजनिक ग्रंथालयांचा गुणात्मक विकास, आधुनिक सेवा उपलब्धता आणि वाचन संस्कृती वृद्धिंगत करण्यासाठी हा पुरस्कार दिला जातो. जागतिक ग्रंथपाल दिन आणि ग्रंथालयशास्त्राचे जनक डॉ. एस. आर. रंगनाथन यांच्या जयंतीनिमित्त मुंबईत आयोजित सोहळ्यात उच्च व तंत्र शिक्षणमंत्री चंद्रकांत पाटील, विधान परिषदेच्या उपसभापती डॉ. नीलम गोऱ्हे आणि शिक्षण विभागाचे मुख्य सचिव गोपालाचार्य रेड्डी यांच्या हस्ते वाचनालयाचे अध्यक्ष मिलिंद कुलकर्णी व सरचिटणीस भिकू बारस्कर यांना पुरस्कार प्रदान करण्यात आला.

पुरस्काराचे स्वरूप रोख रक्कम १ लाख रुपये, सन्मानचिन्ह आणि प्रमाणपत्र असे आहे. या वेळी ग्रंथालय संचालक अशोक गाडेकर, महाराष्ट्र ग्रंथालय संघाचे अध्यक्ष गजानन पोटेवार, जिल्हा ग्रंथालय अधिकारी प्रशांत पाटील यांच्यासह अनेक मान्यवर उपस्थित होते.

या यशाबद्दल कल्याण सार्वजनिक वाचनालयाचे सर्वत्र कौतुक होत असून, हा सन्मान वाचन संस्कृतीच्या प्रसाराला नवीन ऊर्जा देणारा ठरेल, अशी भावना व्यक्त होत आहे.